[90] ‘‘ทฺเวเม , ภิกฺขเว, ธมฺมาฯ กตเม ทฺเว? นามญฺจ รูปญฺจฯ อิเม โข, ภิกฺขเว, ทฺเว ธมฺมา’’ติฯ
[91] ‘‘ทฺเวเม, ภิกฺขเว, ธมฺมาฯ กตเม ทฺเว? วิชฺชา จ วิมุตฺติ จฯ อิเม โข, ภิกฺขเว, ทฺเว ธมฺมา’’ติฯ
[92] ‘‘ทฺเวเม, ภิกฺขเว, ธมฺมาฯ กตเม ทฺเว? ภวทิฏฺฐิ จ วิภวทิฏฺฐิ จฯ อิเม โข, ภิกฺขเว, ทฺเว ธมฺมา’’ติฯ
[93] ‘‘ทฺเวเม, ภิกฺขเว, ธมฺมาฯ กตเม ทฺเว? อหิริกญฺจ อโนตฺตปฺปญฺจ ฯ อิเม โข, ภิกฺขเว, ทฺเว ธมฺมา’’ติฯ
[94] ‘‘ทฺเวเม, ภิกฺขเว, ธมฺมาฯ กตเม ทฺเว? หิรี จ โอตฺตปฺปญฺจฯ อิเม โข, ภิกฺขเว, ทฺเว ธมฺมา’’ติฯ
[95] ‘‘ทฺเวเม, ภิกฺขเว, ธมฺมาฯ กตเม ทฺเว? โทวจสฺสตา จ ปาปมิตฺตตา จฯ อิเม โข, ภิกฺขเว, ทฺเว ธมฺมา’’ติฯ
[96] ‘‘ทฺเวเม, ภิกฺขเว, ธมฺมาฯ กตเม ทฺเว? โสวจสฺสตา จ กลฺยาณมิตฺตตา จฯ อิเม โข, ภิกฺขเว, ทฺเว ธมฺมา’’ติฯ
[97] ‘‘ทฺเวเม , ภิกฺขเว, ธมฺมาฯ กตเม ทฺเว? ธาตุกุสลตา จ มนสิการกุสลตา จฯ อิเม โข, ภิกฺขเว, ทฺเว ธมฺมา’’ติฯ
[98] ‘‘ทฺเวเม , ภิกฺขเว, ธมฺมาฯ กตเม ทฺเว? อาปตฺติกุสลตา จ อาปตฺติวุฏฺฐานกุสลตา จฯ อิเม โข, ภิกฺขเว, ทฺเว ธมฺมา’’ติฯ
ธมฺมวคฺโค จตุตฺโถฯ
(10) 5. พาลวคฺโค
[99] ‘‘ทฺเวเม , ภิกฺขเว, พาลาฯ กตเม ทฺเว? โย จ อนาคตํ ภารํ วหติ, โย จ อาคตํ ภารํ น วหติฯ อิเม โข, ภิกฺขเว, ทฺเว พาลา’’ติฯ
[100] ‘‘ทฺเวเม , ภิกฺขเว, ปณฺฑิตาฯ กตเม ทฺเว? โย จ อนาคตํ ภารํ น วหติ, โย จ อาคตํ ภารํ วหติฯ อิเม โข, ภิกฺขเว, ทฺเว ปณฺฑิตา’’ติฯ
[101] ‘‘ทฺเวเม, ภิกฺขเว, พาลาฯ กตเม ทฺเว? โย จ อกปฺปิเย กปฺปิยสญฺญี, โย จ กปฺปิเย อกปฺปิยสญฺญีฯ อิเม โข, ภิกฺขเว , ทฺเว พาลา’’ติฯ
[102] ‘‘ทฺเวเม, ภิกฺขเว, ปณฺฑิตาฯ กตเม ทฺเว? โย จ อกปฺปิเย อกปฺปิยสญฺญี, โย จ กปฺปิเย กปฺปิยสญฺญีฯ อิเม โข, ภิกฺขเว, ทฺเว ปณฺฑิตา’’ติฯ
[103] ‘‘ทฺเวเม, ภิกฺขเว, พาลาฯ กตเม ทฺเว? โย จ อนาปตฺติยา อาปตฺติสญฺญี, โย จ อาปตฺติยา อนาปตฺติสญฺญีฯ อิเม โข, ภิกฺขเว, ทฺเว พาลา’’ติฯ
[104] ‘‘ทฺเวเม, ภิกฺขเว, ปณฺฑิตาฯ กตเม ทฺเว? โย จ อนาปตฺติยา อนาปตฺติสญฺญี, โย จ อาปตฺติยา อาปตฺติสญฺญีฯ อิเม โข, ภิกฺขเว, ทฺเว ปณฺฑิตา’’ติฯ
[105] ‘‘ทฺเวเม , ภิกฺขเว, พาลาฯ กตเม ทฺเว? โย จ อธมฺเม ธมฺมสญฺญี, โย จ ธมฺเม อธมฺมสญฺญีฯ อิเม โข, ภิกฺขเว, ทฺเว พาลา’’ติฯ
[106] ‘‘ทฺเวเม, ภิกฺขเว, ปณฺฑิตาฯ กตเม ทฺเว? โย จ ธมฺเม ธมฺมสญฺญี, โย จ อธมฺเม อธมฺมสญฺญีฯ อิเม โข, ภิกฺขเว, ทฺเว ปณฺฑิตา’’ติฯ
[107] ‘‘ทฺเวเม , ภิกฺขเว, พาลาฯ กตเม ทฺเว? โย จ อวินเย วินยสญฺญี, โย จ วินเย อวินยสญฺญีฯ อิเม โข, ภิกฺขเว, ทฺเว พาลา’’ติฯ
[108] ‘‘ทฺเวเม, ภิกฺขเว, ปณฺฑิตาฯ กตเม ทฺเว? โย จ อวินเย อวินยสญฺญี, โย จ วินเย วินยสญฺญีฯ อิเม โข, ภิกฺขเว, ทฺเว ปณฺฑิตา’’ติฯ
[109] ‘‘ทฺวินฺนํ , ภิกฺขเว, อาสวา วฑฺฒนฺติฯ กตเมสํ ทฺวินฺนํ? โย จ น กุกฺกุจฺจายิตพฺพํ กุกฺกุจฺจายติ, โย จ กุกฺกุจฺจายิตพฺพํ น กุกฺกุจฺจายติฯ อิเมสํ โข, ภิกฺขเว, ทฺวินฺนํ อาสวา วฑฺฒนฺตี’’ติฯ
[110] ‘‘ทฺวินฺนํ, ภิกฺขเว, อาสวา น วฑฺฒนฺติฯ กตเมสํ ทฺวินฺนํ? โย จ น กุกฺกุจฺจายิตพฺพํ น กุกฺกุจฺจายติ, โย จ กุกฺกุจฺจายิตพฺพํ กุกฺกุจฺจายติฯ อิเมสํ โข, ภิกฺขเว, ทฺวินฺนํ อาสวา น วฑฺฒนฺตี’’ติฯ
[111] ‘‘ทฺวินฺนํ, ภิกฺขเว, อาสวา วฑฺฒนฺติฯ กตเมสํ ทฺวินฺนํ? โย จ อกปฺปิเย กปฺปิยสญฺญี, โย จ กปฺปิเย อกปฺปิยสญฺญีฯ อิเมสํ โข, ภิกฺขเว, ทฺวินฺนํ อาสวา วฑฺฒนฺตี’’ติฯ
[112] ‘‘ทฺวินฺนํ, ภิกฺขเว, อาสวา น วฑฺฒนฺติฯ กตเมสํ ทฺวินฺนํ? โย จ อกปฺปิเย อกปฺปิยสญฺญี, โย จ กปฺปิเย กปฺปิยสญฺญีฯ อิเมสํ โข, ภิกฺขเว, ทฺวินฺนํ อาสวา น วฑฺฒนฺตี’’ติฯ
[113] ‘‘ทฺวินฺนํ, ภิกฺขเว, อาสวา วฑฺฒนฺติฯ กตเมสํ ทฺวินฺนํ? โย จ อาปตฺติยา อนาปตฺติสญฺญี, โย จ อนาปตฺติยา อาปตฺติสญฺญีฯ อิเมสํ โข, ภิกฺขเว, ทฺวินฺนํ อาสวา วฑฺฒนฺตี’’ติฯ
[114] ‘‘ทฺวินฺนํ, ภิกฺขเว, อาสวา น วฑฺฒนฺติฯ กตเมสํ ทฺวินฺนํ? โย จ อาปตฺติยา อาปตฺติสญฺญี , โย จ อนาปตฺติยา อนาปตฺติสญฺญี ฯ อิเมสํ โข, ภิกฺขเว, ทฺวินฺนํ อาสวา น วฑฺฒนฺตี’’ติฯ
[115] ‘‘ทฺวินฺนํ, ภิกฺขเว, อาสวา วฑฺฒนฺติฯ กตเมสํ ทฺวินฺนํ? โย จ อธมฺเม ธมฺมสญฺญี, โย จ ธมฺเม อธมฺมสญฺญีฯ อิเมสํ โข, ภิกฺขเว, ทฺวินฺนํ อาสวา วฑฺฒนฺตี’’ติฯ
[116] ‘‘ทฺวินฺนํ, ภิกฺขเว, อาสวา น วฑฺฒนฺติฯ กตเมสํ ทฺวินฺนํ? โย จ ธมฺเม ธมฺมสญฺญี, โย จ อธมฺเม อธมฺมสญฺญีฯ อิเมสํ โข, ภิกฺขเว, ทฺวินฺนํ อาสวา น วฑฺฒนฺตี’’ติฯ
[117] ‘‘ทฺวินฺนํ , ภิกฺขเว, อาสวา วฑฺฒนฺติฯ กตเมสํ ทฺวินฺนํ? โย จ อวินเย วินยสญฺญี, โย จ วินเย อวินยสญฺญีฯ อิเมสํ โข, ภิกฺขเว, ทฺวินฺนํ อาสวา วฑฺฒนฺตี’’ติฯ
[118] ‘‘ทฺวินฺนํ, ภิกฺขเว, อาสวา น วฑฺฒนฺติฯ กตเมสํ ทฺวินฺนํ? โย จ อวินเย อวินยสญฺญี, โย จ วินเย วินยสญฺญีฯ อิเมสํ โข, ภิกฺขเว, ทฺวินฺนํ อาสวา น วฑฺฒนฺตี’’ติฯ
พาลวคฺโค ปญฺจโมฯ
ทุติโย ปณฺณาสโก สมตฺโตฯ
3. ตติยปณฺณาสกํ